Alla Itolae Nusa 33
Yakupe esi keu siba eleki iselu Esau iluake kai tamata utuna ata. Hoko ilarake eni nanaru papelake inasi, Lea, Rahela kai esi tamata makerika luaru.
Eleki iono esi tamata makerika luaru kai esi anaru esi akmena, eleki me mulisu Lea kai eni nanaru pine Rahela kai eni nanae Yusupe luasi pamuli laleke.
Eleki Yakupe iakmena kai itatu rebai itu eti itetue kwalini.
Po Esau ibala sapa Yakupe, inopai kai iatai. Luasi rani kai lomai.
Kena Esau iselu bina kai kwetela meru itneu Yakupe be, “Sie rebe esi sakesa kai ale meije, siaise?” Yakupe iralake be, “Meije kwetela rebe Alla Irilukesi etekue.”
Eleki bina makerika lua meru esi tehaike Esau kai esi tatu lope tapele.
Eleki Lea kai eni nanaru esi tehaikeni kai esi tatu lope tapele. Pamuli solike Yusupe kai Rahela luasi tehainei kai luasi tatu lope tapele.
Eleki Esau itneu Yakupe be, “Aono tamata kai binatanaru keu totoini rebe minae au tetuesie leke mula?” Yakupe iombe, “Leke eono kwali lalemu ndina.”
Po Esau ibeteke be, “Kwali, ariluke ete au yanoma le auku taneiaru boka peneka.”
Yakupe ibeteke be, “Yake! Sepo kwali lalemue ndinake au hoko arana neka. Ete aure, au selu kwali oamue sakesa kai au selu Allah oaIje neka, le saisa rebe kwali aono ete au meije mise kuate.
Au kotie bei kwali ale leke arana saisa rebe au rilukelu meije. Alla Iono misete ete au hoko saisa rebe au perlure Irilukele ete au.” Yakupe iuma rame eti kwalini Esau irana binatana rebe irilukelue.
Eleki Esau ibeteke be, “Mai ite keu, au akmena le ite.”
Yakupe iombe, “Kwali arekwa be kwetela meiju esi ktili mo, kai suke au mamau le binatana rebe erususu sare. Le sepo keu lelu nununu hoko masike petu esare po pusulu umata ne.
Kwali akeu akmena neka le au keu mamau lulu binatanaru kai kwetelaru eti ami luake loko kwali ale mpai Seire ne.”
Esau ibeteke be, “Sepo ele mere hoko au naya bei tamata kuila rebe esi luake kaiku ete kwali ale.” Po Yakupe iombe, “Kwali ono susaemu yanoma! Le kwali aono misete ete au peneka.”
Hoko kena petu mere Esau ileu suike lopai ulata rebe esi nane Seire ne.
Po Yakupe ikeu lori Sukote, eleki ieleke tenda ete mere kai iono tenda ete eni binatanaru. Ele mere hoko otoi mere esi nane Sukote.
Eleki esi keu lopai Sikeme. Hoko Yakupe esi lalane bei ndi Padan-Arame eti esi luake mpai Sikeme, me otoi Kanane kena hlamate. Eleki iono eni tendare sapaleuke lemataije sa tehaike kota mere.
Tapele otoi rebe ieleke tenda kenae mere isabe bei Sikheme amai Hemore eni anubuaru kena kepe perake mata utune.
Eleki ieleke otoi kena pala taneia rebe rilukele ete Allare ete mere kai iono esi nane, “El-elohe-Israele. Esi natire Israelaru esi Alla rebe Ikbasa ela titinai.”